Судалгаа

Археологийн малтлага судалгаа

Эртний төрт улсаас Их Монгол улсын үе, түүний дараах хаад язгууртны өв соёл хүртэлх 3 чиглэлийн малтлагын төсөл, төлөвлөгөөт ажил.

Археологийн малтлага Эрдэм шинжилгээ Ном, хэвлэл Тайлан Судлаачид

3 чиглэл

Малтлага судалгааны чиглэлүүд

Музейн эрдэм шинжилгээний баг олон жилийн турш 3 үндсэн чиглэлээр хээрийн малтлагын ажлыг тогтмол явуулж байна.

2023 оноос

“Талын эзэнт гүрэн” төсөл

Чингис хаан Үндэсний музей, ШУА-ийн Археологийн хүрээлэн, Түүх, угсаатны зүйн хүрээлэнтэй хамтран “Талын эзэнт гүрэн” төслийг 2023 оноос хэрэгжүүлж байна. Тус төсөл нь Монгол улсын нутаг дэвсгэр дээр археологи, угсаатны зүйн хайгуул судалгаа хийх, Чингис хааны түүхэнд холбогдох угсаатны мэдээ баримт цуглуулах, орчин цагийн нүүдлийн аж ахуйг судлах үндсэн зорилготой. 2024 оноос судалгааны цар хүрээ, баг бүрэлдэхүүнээ өргөжүүлж Унгар улсын Угсаатны зүйн музейн судлаачидтай хамтарч эхэлсэн.

2021–2023

“Эзэнт гүрний өв соёл” төсөл

Чингис хаан Үндэсний музей, ШУТИС-ийн БУХС, Чингис хааны өв, соёлын хүрээлэнгийн хамтарсан судалгааны баг “Эзэнт гүрний өв соёл” төслийн хүрээнд 2021–2023 онд Сүхбаатар аймгийн Түвшинширээ сумын нутаг Оорцог овоо уулын олон үеийн дурсгалт газарт археологийн малтлага судалгаа хийж гүйцэтгэсэн юм. Нийт 53 оршуулгын дурсгал малтан судалж, 150 гаруй эд өлгийн зүйлс илрүүлэн олсноос өдгөө 37 дэсийн 62 ширхэг үзмэрийг музейн үзүүллэг, дэглэлтэд оруулан олон нийтэд хүртээл болгоод байна.

2024 оноос

“Эзэнт гүрний өв соёл II” төсөл

“Эзэнт гүрний өв соёл” төслийн үргэлжлэл болгон 2024 оноос “Эзэнт гүрний өв соёл II” төслийг хэрэгжүүлж буй бөгөөд өдгөө Сүхбаатар аймгийн Сүхбаатар сумын нутагт орших Өрвөл уулын дурсгалт газарт археологийн малтлага судалгааны ажил гүйцэтгэж байна.

2023 оноос

“Хүннүгийн хаад язгууртны өв соёл” төсөл

Чингис хаан Үндэсний музейгээс үндэсний хэмжээний бие даасан “Хүннүгийн хаад язгууртны өв соёл” төслийг 2023 оноос эхлэн санаачлан хэрэгжүүлж эхлүүлээд байна. Тус төслийн археологийн малтлага судалгааг Төв аймгийн Борнуур сумын нутаг, Сүжигтийн аманд орших Ноён уулын дурсгалт газарт гүйцэтгэж байна.

2023–2024

“Монголын эзэнт гүрний дараах өв соёл” төсөл

2023–2024 онд Чингис хаан Үндэсний музейгээс “Монголын Эзэнт гүрний дараах өв соёл” төслийг амжилттай хэрэгжүүлсэн. Энэхүү төслийн хүрээнд Дорноговь аймгийн Хөвсгөл сумын нутагт орших Цувираагийн хийдийн дурсгалт газар болон Өргөн сумын нутагт орших Үүдийн амны дурсгалт газарт археологийн малтлага судалгаа хийж гүйцэтгээд байна.

2025 оноос

“Хүннүгийн төрт улсын хаад, язгууртны оршуулгын зан үйлийн судалгаа” төсөл

Чингис хаан Үндэсний музейн санаачилга, санхүүжилтээр 2025 оноос “Хүннүгийн төрт улсын хаад, язгууртны оршуулгын зан үйлийн судалгаа” төслийг хэрэгжүүлж эхлээд байна. Тус төслийн хүрээнд Архангай аймгийн Өндөр-Улаан сумын Хануй багийн нутагт орших Балгасан талын “Гол мод II” хүннүгийн язгууртны оршуулгын дурсгалт газарт археологийн малтлага судалгааг зохион байгуулав.